3DNews-ի  բաժանորդագրություն
Կիրակի, 29 June 2025
Գլխավոր » 2011 » Նոյեմբեր » 18 » ՏՏ Լրատվական, Տեղեկատվական Տեխնոլոգիաներ
Visa-ն, հայկական բանկերն ու էլեկտրոնային առեւտուրը
Հայաստանյան մի շարք բանկերի ներկայացուցիչներ արձագանքել են նոյեմբերի 9-ին, NEWS.am-ի «Արդյոք Visa-ն խոչընդո՞տ է Հայաստանում էլեկտրոնային առեւտրի զարգացման համար» լուրին:

Հիշեցնենք` Ինֆորմացիոն տեխնոլոգիաների ձեռնարկությունների միությունը կազմակերպել էր կլոր սեղան` նվիրված էլեկտրոնային առեւտրի հիմնախնդիրներին: Կլոր սեղանի ընթացքում ամփոփվեցին ոլորտի խնդիրների լուծման նպատակով ստեղծված միջգերատեսչական աշխատանքային խմբի գործունեության միջանկյալ արդյունքները: Նշվել է (այդ թվում` լրագրողներին բաժանված հատուկ տեղեկանքում), որ Հայաստանում էլեկտրոնային առեւտրի զարգացման հիմնական խնդիրներից մեկը կապված է Visa միջազգային քարտերի օգտագործման անհնարինության հետ:

Իսկ այդ անհնարինություն էլ իր հերթին հետեւանք է նրա, որ հայաստանյան բանկերը չունեն համապատասխան լիցենզիան` Visa International e-commerce license: Արդյունքում` Հայաստան ժամանող զբոսաշրջիկները չեն կարողանում էլեկտրոնային առեւտուր իրականացնել, ասենք` հյուրանոցներում:

Հատուկ ընդգծենք, ՀՀ էկոնոմիկայի նախարարի խորհրդական Վահե Դանիելյանի այն հայտարարությունը, որ հայաստանյան բանկերը հետաքրքրություն չեն ցուցաբերում այդ լիցենզիան ստանալու համար, թեեւ շուկան ինքնին հեռանկարային է:

Ահա` այս լրատվությունը հրապարկելուց հետո խմբագրություն զանգահարող բանկերի քարտային բաժինների ներկայացուցիչները հավաստիացնում էին, որ իրենք չեն հրավիրվել կլոր սեղանին, ու կոռեկտ չեն համարում, որ առանց իրենց ներկայության քննարկվել է բանկերին վերաբերող խնդիրներ: Բանկերից երկուսի ներկայացուցիչները նաեւ ասացին, որ իրականում իրենք սկսել են գործընթաց Visa International e-commerce license ձեռքբերելու ուղղությամբ:

Նշենք սակայն, որ նմանատիպ կլոր սեղաններին լրատվամիջոցները նույնպես հրավիրյալներ են, այլ ոչ թե կազմակերպիչներ, ու բնականաբար` պատասխանատու չենք այս կամ այն կողմին հրավիրել-չհրավիրելու համար: Երկրորդ` մենք բանկերին առաջարկեցինք իրենց հուզող ցանկացած հարցադրում ներկայացնել գրավոր, մեկի հետ նույնիսկ համապատասխան պայմանավորվածություններ եղան: Սակայն մինչ այսօր որեւէ գրավոր պարզաբանում չի ստացվել, թեեւ խմբագրությունը օրական մոտ 10 հեռախոսազանգ էր ստանում տարբեր հերքումներով ու դժգոհություններով:

Այնպիսի տպավորություն է, որ բանկերը պարզապես լուրջ չեն վերաբերում ոչ նման քննարկումներին, ոչ էլեկտրոնային առեւտրի հիմնախնդիրներին, ընդամենը մտահոգված են իրենց իմիջի հարցերով: Կամ էլ այնքան են տարված բարձր տոկոսների միջոցով հեշտ փողեր աշխատելու մոլուցքով, որ պարզապես ինովացիոն ներդրումներ անելու «հավես» չունեն:

Իրականում էլեկտրոնային առեւտրի շուկան իրոք բավական խոստումնալից է: Թեւեւ Visa International e-commerce license-ը թանկ հաճույք է` լիցենզիան արժե 250 հազ. դոլար, միայն զբոսաշրջային ոլորտում կարելի է տարեկան մոտ 500 հազ. դոլարի եկամուտ ակնկալել: Հաշվի առնելով եւ հյուրանոցների ներկայիս գերծանրաբեռնվածությունը, եւ զբոսաշրջության աճը: Հարկ է նշել, որ տնտեսապես իսկապես շահավետ չէ, եթե լիցենզիան ձեռքբերելու հայտ ներկայացնեն մի քանի բանկեր: Սակայն հնարավոր է 1 բանկի կողմից լիցենզիան ձեռքբերելու դեպքում մյուսների հետ համագործակցելու հեռանկար: Հնարավոր է` բանկերը պարզապես չեն նկարողանում համաձայնության գալ, թե իրենցից ով պետք է դառնա էլեկտրոնային առեւտրի դրոշակակիրը` բոլոր ռիսկերով ու օգուտներով հանդերձ:
Հավանել նորությունը
«+8» - հավանությունների քանակ
Դիտումներ: 417 | Ավելացրել է: 3DNewscomm | Հայտնի տեգեր: Visa International e-commerce licen, visa, News.am | Գնահատական: 1.0/8 | Ավելացվել է: 18 November 2011, 21:59
Ընդհանուր Մեկնաբանությունները: 0
Չկան մեկնաբանություններ
Միայն գրանցված օգտվողները կարող են ավելացնել մեկնաբանություն
[ Գրանցվել | Մուտք ]