Apple ընկերությունը հաստատել է մարտկոցների հետ կապված խնդիրները
|
Apple ընկերությունը պաշտոնապես հայտարարել է iPhone սմարթֆոններում առկա մարտկոցների հետ կապված խնդիրների մասին: Այդ սմարթֆոնները գտնվում են iOS 5 համակարգի ղեկավարման ներքո:
Ընկերության ներկայացուցիչները հայտարարել են, որ սմարթֆոնների մարտկոցներն արագ են նստում՝ iOS 5–ի թերի լինելու պատճառով: Այս թերությունը վերացվելու է օգտատերերին նոր համակարգ ուղարկելու միջոցով:
Թարմացված համակարգի ուղարկման ժամկետները չեն հստակեցվում, սակայն մշակողներին հասանելի է iOS 5.0.1 տարբերակը, որի նկարագրության մեջ ասվում է, որ այն ի վիճակի է նպաստել, որպեսզի մարտկոցները շուտ չնստեն: Այս մասին հաղորդում է BGR-ն: |
«Одноклассники.ru»-ի օգտագործողները կկարողանան ստեղծել «միջոցառումներ»
|
«Одноклассники»-ն տեստային ռեժիմում գործարկել է «Միջոցառումներ» բաժինը, որը թույլ կտա կազմակերպել տարբեր իրադարձություններ, հրավիրել ընկերներին: Այս պահին օգտագործողները կարող են ստեղծել միայն փակ միջոցառումներ, որոնց հրավերներն ուղարկվում են միայն նախաձեռնողի կողմից:
Նշենք, որ այս ֆունկցիան հասանելի է նաև ռուսական «ВКонтакте» և ամերիկյան Facebook սոցցանցերում:
«Միջոցառումների» կարգավորումների նկատմամբ անուշադրության պատճառով Facebook-ի օգտագործողները բազմիցս ընկել են անհարմար դրության մեջ: Այսպես, այս տարվա ամռանը 16-ամյա գերմանուհին Facebook-ում ստեղծել էր բաց միջոցառում, որին մասնակցելու հայտ էր ներկայացրել 1500 հոգի: Իսկ 2010-ի սեպտեմբերին անգլուհին հրավիրել էր իր երեկույթին 21 հազար օգտագործողի: |
Apple-ը կթարմացնի iOS 5-ը, որպեսզի լուծի iPhone-ի մարտկոցի խնդիրը
|
Apple ընկերությունը պարզել է, թե ինչու է iOS 5 օպերացիոն համակարգով աշխատող iPhone-ի մարտկոցի էներգիան շատ արագ սպառվում: Պատճառը օպերացիոն համակարգի սխալներն են, որոնց պատճառով մարտկոցը ծախսում է ավելի շատ էներգիա, քան անհրաժեշտ է: All Things Digital-ը գրում է, որ մի քանի շաբաթից ընկերությունը կթողարկի iOS 5-ի թարմացում: Մշակողների շրջանում արդեն սկսվել է iOS 5.0.1-ի փորձարկումը:
Խնդրի առաջ են կանգնել ոչ միայն նոր iPhone 4S, այլև ավելի հին մոդելներ օգտագործողները, ովքեր իրենց սմարթֆոնում տեղադրել են iOS 5 ՕՀ-ն: Apple-ի տեխնիկական սպասարկման կայքում մարտկոցի խնդրի թեմայով արվել է ավելի քան 3100 մեկնաբանություն: |
Մեծ Բրիտանիայում կթողարկվի 25 դոլար արժողությամբ համակարգիչ
|
Քեմբրիջի ինժեներները խոստացել են մինչև 2011-ի ավարտը թողարկել համակարգիչ, որը կաժենա ընդամենը 25 դոլար: Խոսքն այցեքարտի երկարություն ու լայնություն ունեցող տուփի մասին է, որին պետք է լրացուցիչ էկրան միացվի, ընդ որում՝ սարքն ապահովում է և՛ թվային, և՛ անալոգային միացում:
Մինի-համակարգիչը՝ Raspberry Pi-ն, ունի նաև USB-մուտքեր ստեղնաշարի ու մկնիկի համար:
Նախագծի ղեկավար Դեյվիդ Բրեբեյնի խոսքերով՝ առաջիկա ամիսներին սարքի 10 000 օրինակ կուղարկվի ծրագրային ապահովում մշակողներին, որպեսզի նրանք ծրագրեր գրեն համակարգչի համար:
Իսկ սովորական օգտագործողների համար նախատեսված տարբերակը վաճառքի դուրս կգա հաջորդ տարվա ընթացքում: GigaOm-ը գրում է, որ համակարգչի թիրախային լսարանը դպրոցականներն են:
Raspberry Pi –ի մշակողները նշում են նաև, որ համակարգիչը նախատեսված է ոչ թե ինտերնետից օգտվելու կամ խաղեր խաղալու, այլ երեխաներին ծրագրային կոդ գրել սովորեցնելու համար: |
Ինչպես վիրտուալ ստեղնաշարը դարձնել իրական
|
iPad-ը և ժամանակակից այլ պլանշետային համակարգիչները, որոնք չունեն ստեղնաշար, նախատեսված չեն երկար տեքստեր հավաքելու համար: Սակայն կան տարբեր հարմարանքներ, որոնք լրացնում են այդ բացը:
TouchFire-ը սիլիկոնային շարվածք է՝ նախատեսված սենսորային էկրանի վրա դնելու համար: Ստեղնաշարը պատրաստել է դիզայներ Սթիվ Իսաակը: Սիլիկոնային ստեղները համապատասխանում են էկրանի շարվածքին, և տպավորություն է ստեղծվում, որ տեքստ ես հավաքում նոութբուքի ստեղնաշարի վրա:
Երբ TouchFire-ը չի օգտագործվում, այն կարելի է ամրացնել պլանշետի պատյանին: www.gizmag.com-ը գրում է, որ հարմարանքը շուկա դուրս գալու դեպքում կարժենա մոտ 45 դոլար: |
Եվգենի Կասպերսկի. Կիբեռհարձակումների հետեւեւմ կանգնած են
|
Մոտ ժամանակներս աշխարհը կարող է բախվել նոր սպառնալիքի` կիբեռահաբեկչության հետ, որը կարող է աղետալի հետեւանքներ ունենալ; Այդ մասին Լոնդոնում, ինտերնետ-անվտանգությանը նվիրված միջազգային կոնֆերանսում, հայտարարել է Եվգենի Կասպերսկին, ում ղեկավարած ընկերությունը հայտնի է համակարգչային վիրուսների, սպամերի ու հաքերային գրոհների դեմ պաշտպանական համակարգերի մշակմամբ:
«Մենք ապացույցներ չունենք, բայց ես չեմ բացառում, որ շատ կիբեռգրոհների հետեւում կանգնած են տարբեր երկրների հատուկ ծառայությունները: Զարգացումները տանում են դեպի կիբեռ-պատերազմներ ու կիբեռահաբեկչության, որը տեխնիկական առումով, ցավոք, հնարավոր է»,-BBC-ի հետ զրույցում ասել է Ե. Կասպերսկին; |
Թողարկվել է Opera Mini-ի 6.5 տարբերակը, որը հասանելի է հեռախոսների մեծ մասին
|
Ներկայացվել է Opera Mini բջջային դիտարկչի 6.5-րդ տարբերակը, որը կարող են բեռնել iPhone, iPad, BlackBerry, Symbian S60 և Java-հեռախոսների օգտագործողները: Դիտարկչի հիմնական յուրահատկությունն այն է, որ այն կարողանում է իրական ժամանակում գնահատել՝ ինչքան է խնայել օգտագործողը կայքերը դիտելիս:
Նշենք, որ Opera Mini-ն մոտ 90%-ով սեղմում է տվյալները՝ թույլ տալով օգտագործողին խնայել:
Նոր տարբերակում հասցեի տողում ավելացվել է նաև «աստղ», որի օգնությամբ արագ կարելի է էջանշել կայքերը կամ դրանք ավելացնել դիտարկչի մեկնարկային էջում:
Opera Mini 6.5-ը հասանելի է Apple App Store-ում և Android Market-ում, ինչպես նաև կարելի է այն բեռնել m.opera.com կայքից՝ Symbian S60, BlackBerry և Java-հեռախոսների համար: |
|
